په ننګرهار ولايت کې د ووينام ملي لوبډلې د غوراوي سيالۍ پرانيستل شوې
په ننګرهار ولایت کې د ووينام ملي لوبډلې د غوراوي سيالۍ نن دوشنبه د دې ولايت په کوربتوب د "٩" ولايتونو تر "٩٠"زياتو ورزشکارانو ترمنځ د هډې فارم په ورزشي جمنازيوم کې پرانستل شوې.
د دې سياليو د پرانيستې په مراسمو کې د ننګرهار د بدني روزنې ورزش او المپيک رئیس عبدالسلام وزيروال، د بدني روزنې او ورزش عمومي ریاست د دعوت او ارشاد رئیس دادمحمد بريال عطايي، د بدني روزنې او ورزش عمومي ریاست د املاکو عمومي مدير استاد لعل محمد سيار، د ووينام ملي فدراسیون رئیس، د ننګرهار د اطلاعاتو او کلتور رئیس، د ووينام فدراسیون ولايتي مسوولینو، د فدراسيونونو رئيسانو، استادانو، ګڼ شمېر ورزشکاران او د ورزش مينه والو ګډون درلود.
د دې سياليو د پرانيستې مراسمو کې د ننګرهار بدني روزنې ورزش او المپيک رئیس عبدالسلام وزيروال له مرکز څخه راغلي پلاوي د ولايتونو د ورزش برخې مشرانو او د سياليو ګډونوالو ته ښه راغلاست او هر کلى ووايه، وزيروال د ورزش له ادارې مننه وکړه چې د زورخانه يې غوراوي سياليو وروسته يې يو ځل بيا ننګرهار د ووينام ملي لوبډلې د غوراوي سياليو لپاره غوره کړ. په خبره يې؛ دوى د هرې ورزشي رشتې سياليو د ترسره کېدو لپاره پوره چمتووالى لري.
ورپسې د بدني روزنې او ورزش عمومي ریاست د دعوت د ارشاد رئیس دادمحمد بریال عطايي خبرې وکړې نوموړي دعوتي مسایل له ګډونوالو سره شریک کړل.
د پرانيستې تر مراسمو وروسته د ووينام ځينې نمايشونه او سيالۍ ترسره شوې.
د يادونې ده چې د ووينام ملي لوبډلې د غوراوي دغه سيالۍ به څلور ورځې دوام وکړي چې په ترڅ کې به يې ګټونکي ورزشکاران د ووينام ملي لوبډلې ته غوره شي.
