په ننګرهار کې د سنوکر رمضان جام سيالۍ پيل شوې

د ننګرهار ولايت د بدني روزنې او سپورټ رياست په غوښتنه د سنوکر فدراسيون له لوري په صمد کلب کې د سنوکر د ۵۰ لوبغاړو ترمنځ د سنوکر رمضان جام سيالۍ پيل شوې.

په همدې موخه په جوړو شويو مراسمو کې د ننګرهار ولايت د بدني روزنې او سپورټ رياست استازو، ورزشي مسولينو او ورزشکارانو ګډون کړی و.

په پيل کې د ياد ولايت ورزشي مسولينو خبرې وکړې زياته يې کړه: هڅه کوو، چې ورزش يو معياري پوړ ته ورسوو او چاته اجازه نه ورکوو چې له ورزش څخه ناوړه استفاده وکړي. دوی همداراز زياته کړه چې هر فدراسیون مکلف دی؛ ترڅو د خپلې رشتې د ودې او پرمختګ لپاره ګړندي ګامونه پورته کړي.

د ياد پروګرام په دويمه برخه کې د څلورو جوړو ورزشکارانو ترمنځ د سنوکر سيالۍ وشوې، چې په پايله کې عبدالخالق، شيرين اغا، واحدالله او بصير په ترتيب سره خپلو سيالو ورزشکارانو ته ماتې ورکړه او برياوې يې خپلې کړې.

بايد يادونه وشي چې يادې سيالۍ به لس ورځې دوام وکړي.