په هلمند کې د لسو ولسوالیو ترمنځ د ټېپ بال کرکټ لومړی پړاو سیالۍ پیل شوې
د هلمند ولایت د بدني روزنې او سپورت امریت او ټېپ بال کرکټ فدراسیون په همغږۍ، د دې ولایت د مرکز لښکرګاه ښار اړوند په غازي محمد ایوب خان لوبغالي کې د ۱۰ ولسوالیو د لوبډلو ترمنځ، د ټېپ بال کرکټ لومړی پړاو سیالۍ پیل شوې.
په دې سیالیو کې د لسو ولسوالیو نادعلي، مارجې، ناوه، ګرمسېر، باباجي ګرشک، سنګین، نوزاد، موسی کلا او کجکي منتخبې لوبډلې ګډون لري.
د سیالیو د پیل لوبه د سنګین او کرشک ولسوالیو د منتخبو لوبډلو ترمنځ ترسره شوه، چې د ګرشک منتخبې لوبډلې بریا ترلاسه کړه.
یادې لس اوریزې سیالۍ په دوو ګروپونو ویشل شوې دي، چې هره ورځ به یې څلور لوبې ترسره کیږي او یوه اوونۍ به دوام وکړي.
د سیالیو موخه د هلمند د ولسوالیو ترمنځ یووالی او همغږي رامنځ ته کول دي.
