په کابل کې د ۱۸۰ ورزشکارانو ترمنځ د جمناستیک تشویقي سیالۍ ترسره شوې
د المپیک ملي کمېټې او ورزش لوی ریاست اړوند د جمناستیک فدراسیون له لوري د کابل په کچه د څلورو زونونو د ۱۸۰ ورزشکارانو ترمنځ د یاد ریاست په ۵۰۰ کسیز جمنازیوم کې د جمناستیک تشویقي سیالۍ ترسره شوې.
په دغو سیالیو کې د کابل د څلورو زونونو له ۳۶ کلبونو څخه ۱۸۰ ورزشکارانو ګډون کړی و، چې په پایله کې د مختلفو زونونو او کلبونو ورزشکارانو پکې لومړي دویم او درېیم مقامونه خپل کړل.
دغه سیالۍ د څلورو کټګوریو تنکیو ځوانانو، نویو ځوانانو، ځوانانو او لویانو ترمنځ ترسره شوې او موخه یې ټاکنیزو سیالیو ته د غوره ورزشکارانو موندل وو.
هېره دې نه وي، چې دغه سیالۍ په دوو وسیلو توشک او پوښ میز کې ترسره شوې او په پای کې غوره ورزشکارانو ته مډالونه، ستاینلیکونه او چمتو شوې ډالۍ ورکړل شوې.
