پکتيکا؛ برمل ولسوالۍ کې د ټېپ بال کرېکټ سیالۍ پای ته ورسېدې
د پکتيکا ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ياد ولايت په برمل ولسوالۍ کې د ۱۱ لوبډلو ترمنځ د ټېپ بال کرېکټ سیالۍ، چې لس ورځې مخکې پيل شوې وې د وزيرستان زلمو لوبډلې په اتلولۍ پای ته ورسېدې.
د يادو سياليو پايلوبه د وزيرستان زلمو او ماويخېل لوبډلو ترمنځ وشوه، د لوبې پچه وزيرستان زلمو لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۶ لوبغاړو په سوځېدو سره خپلې سيالې لوبډلې ته د ۱۸۳ منډو هدف کېښود، په ځواب کې ماويخېل لوبډلې د ټولو لوبغاړو په سوځېدو سره ۱۵۲ منډې وکړې او لوبه يې د ۳۱ منډو په توپير وبايلله.
