پکتيکا؛ برمل ولسوالۍ کې د ۱۶ لوبډلو ترمنځ د ټېپ بال کرېکټ سيالۍ پای ته ورسېدې
د پکتيکا ولايت د بدني روزنې او ورزش آمريت په همغږۍ، د ټېپ بال کرېکټ فدراسيون د استازولۍ له لوري د برمل ولسوالۍ اړوند کمر کلي کې د ۱۶ لوبډلو ترمنځ د ټېپ بال کرېکټ سيالۍ د يوولس ستورو لوبډلې په اتلولۍ پای ته ورسېدې.
د يادو سياليو پايلوبه د يوولس ستورو او اتحاد لوبډلو ترمنځ وشوه، د لوبې پچه يوولس ستورو لوبډلې وگټله او لومړی يې د توپ وهنې پرېکړه وکړه، چې په ټاکلو ۸ اورونو کې يې د ۷ لوبغاړو په سوځېدو سره خپلې سيالې لوبډلې ته د ۸۳ منډو هدف کېښود، په ځواب کې اتحاد لوبډلې د ټولو اورونو په لوبولو سره ۵۳ منډې وکړې او لوبه يې د ۲۰ منډو په توپير وبايلله.
دا سيالۍ د ځوانانو ترمنځ د يووالي په موخه وشوې او ۱۷ ورځې يې دوام وکړ.
