پکتيکا؛ گيان ولسوالۍ کې د ټېب بال کرکټ سيالۍ پای ته ورسېدې
پکتيکا ولايت د بدني روزنې او سپورټ آمريت اړوند، د ټېب بال فدراسيون په نمايندګۍ او د برک( BARC) مؤسسې په مالي ملاتړ، د ياد ولايت په گيان ولسوالۍ کې د پنځو لوبډلو تر منځ د ټېب بال کرکټ سيالۍ د گيان ب لوبډلې په اتلولۍ پای ته ورسېدې.
د يادو سياليو پايلوبه د گيان لېسې او د گيان ب لوبډلو تر منځ ترسره شوه، د لوبې پچه گيان لېسې لوبډلې وگټله او لومړی يې د توپ وهنې پرېکړه وکړه، چې په ټاکلو شپږو اورونو کې يې سیالې لوبډلې ته د ۶۵ منډو هدف وټاکو، گيان ب لوبډلې ياد هدف په پنځو اورونو کې پوره کړ او د يادو سياليو اتلولي يې په خپل نوم کړه.
دغه سيالۍ، چې يو ورځ يې دوام وکړ، موخه يې د ځوانانو تر منځ ټولنيز سمون ښودل شوی و.
په پای کې لومړي او دويم مقام گټونکو لوبډلو ته نغدي ډالۍ او لوبغاړو ته ورزشي وسايل ورکړل شول.
