پکتيکا کې د پنځو لوبډلو ترمنځ د رسنيز جام په نوم د ټېپ بال کرکټ درېيم پړاو سيالۍ پيل شوې
د پکتيکا ولايت د بدني روزنې او ورزش امريت په همغږۍ او د اطلاعاتو، کلتور رياست او کرکټ امريت په گډه همکارۍ د ياد ولايت په مرکز ښرنه کې د پنځو لوبډلو ترمنځ د رسنيز جام په نوم د ټېپ بال کرکټ درېيم پړاو سيالۍ پيل شوې.
په دغو سياليو کې د پښتون غږ راډيو، پکتيکا ملي راډيو، تعليم الفرقان راډيو، مېلمه راډيو او اطلاعاتو، کلتور رياست لوبډلو گډون کړی، چې لومړنۍ لوبه يې د پښتون غږ او ملي راډيوگانو ترمنځ ترسره شوه، چې پښتون غږ راډیو د لوبې پچې په گټلو سره په ټاکلو ۱۹ اورونو کې د څلورو لوبغاړو په سوځېدو سره سیالې لوبډلې ته د ۱۵۳ منډو هدف وټاکه، په مقابل کې ملي راډيو د ټولو اورونو په لوبولو سره يواځې ۱۱۷ منډې وکړې او لوبه يې د ۳۵ منډو په توپير وبايلله.
د یادولو وړ ده، چې د دغو سياليو د ترسره کېدو موخه د رسنيو خبريالانو لپاره د سالمې تفريح برابرول او ترمنځ يې همغږي رامنځته کول دي، چې اته ورځې به دوام وکړي.
