پکتيکا کې د ۳۷ لوبډلو ترمنځ د نیزه وهنې سيالۍ وشوې
د پکتيکا ولايت د بدني روزنې او ورزش آمريت اړوند د نیزه وهنې، وزلوبې او سيمه ييزو لوبو ملي فدراسيون د استازولۍ له لوري د ياد ولايت په مرکز ښرنه کې ۳۷ لوبډلو ترمنځ د نیزه وهنې سيالۍ د اتفاق کلب لوبډلې په اتلولۍ پای ته ورسېدې.
د دغو سياليو په پايله کې اتفاق کلب لوبډلې د ۶۸ امتيازونو په ترلاسه کولو لومړی، خېر کوټ کلب د ۵۶ امتيازونو په خپلولو سره دويم او يوسف خېل کلب بيا د ۵۰ امتيازونو په ترلاسه کولو سره درېيم مقام خپل کړ.
د يادو سياليو موخه ملي او دودیزو لوبو ته وده ورکول و، چې يوه ورځ يې دوام وکړ او په پای کې لومړي، دويم او درېيم مقام گټونکو لوبډلو ته چمتو شوې ډالۍ ورکړل شوې.
