پکتیکا؛ مرکز ښرنه کې د رسنیو د شپږو لوبډلو ترمنځ د ټېپ بال کرېکټ سیالۍ پیل شوې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز ښرنې ښار کې د رسنیو د شپږو لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د پښتون غږ راډیو او بدلون څرک راډیو ترمنځ ترسره شوه. د لوبې پچه پښتون غږ راډیو لوبډلې وګټله او لومړی یې توپ وهنه وکړه. چې په ټاکلو ١٢ اورونو کې یې د څلورو ویکټو په زیان خپلې سیالې لوبډلې ته د ١٣٢ منډو هدف وټاکه. بدلون څرک راډیو لوبډلې د هدف په تعقیب کې ١١٤ منډې وکړې او د ١٧ منډو پهړتوپیر یې لوبه وبایلله.
دا سیالۍ ورزش ته د ځوانانو د هڅولو په موخه پیل شوي دي، چې دوې اوونۍ به دوام وکړي.
