پکتیکا؛ په برمل ولسوالۍ کې د ۲۶ لوبډلو ترمنځ د ټېپ بال کرېکټ سيالۍ پای ته ورسېدې
د پکتیکا ولایت د بدني روزنې او سپورټ امریت اړوند د ټېپ بال کرېکټ فدراسیون د استازولۍ له لوري د ياد ولايت په برمل ولسوالۍ کې د ۲۶ لوبډ لوترمنځ د ټېپ بال کرېکټ سيالۍ، چې ۱۱ ورځې مخکې پيل شوې وې د شاقیب الحسن لوبډلي په اتلوالي پای ته ورسېدې.
د دغو سياليو پايلوبه د شاقيب الحسن او نحل ستوري لوبډلو ترمنځ ترسره شوه، نحل ستوري لوبډلې د پچې په ګټلو سره د توپ وهنې پرېکړه وکړه، چې په ټاکلو لسو اورونو کې د شپږو لوبغاړو په سوځېدو سره مقابلې لوبډلې ته د ۱۶۰ منډو هدف وټاکه. په ځواب کې د شاقيب الحسن لوبډلې ټاکل شوې هدف د لوبې په ورستي اور کې د پنځو لوبغاړو په سوځېدو سره پوره کړ او پنځو ويکټو په توپير يې لوبه وګټله.
د يادو سياليو موخه د ځوانانو ترمنځ يووالي رامنځته کول وو او په پای کې لومړي مقام ګټونکي لوبډلې ته يو عراده بايسکل ورکول شو.
