کابل؛ بهروز جعفري د هېواد د ۱۷ کلنو کم عمره فوټسال ملي لوبډلې د نوي روزونکي په توګه وټاکل شو
د المپيک، بدني روزنې او ورزش عمومي رياست په همکارۍ او د فوټبال ملي فدراسیون او فوټسال ملي کميټې له لوري د هېواد د ۱۷ کلنو کم عمره فوټسال ملي لوبډلې د رهبري په جوړښت کې نوي بدلونونه راوستي، چې له مخې یې ښاغلی بهروز جعفري په رسمي ډول د يادې لوبډلې د نوي روزونکي په توګه معرفي شو.
د نوي روزونکي دغه مراسم په یوه خبري ناستې سره ترسره شول، چې ښاغلی جعفري په رسمي ډول د ۱۷ کلنو کم عمره فوټسال ملي لوبډلې تخنیکي مشري پر غاړه واخیسته. د روزونکي تر معرفي سربېره، د لوبډلې د فني کارکوونکو په جوړښت کې هم بدلونونه راوستل شول، څو د راتلونکو سیالیو لپاره د هېواد د ځوانو لوبغاړو د مهارتونو د لوړوالي او پرمختګ لامل شي.
په دغو مراسمو کې د المپیک، بدني روزنې او ورزش د عمومي ریاست او د فوټبال ملي فدراسیون فني او مسلکي مرستیال حافظ احمدجان ځدراڼ، د کابل ولایت د فوټبال فدراسیون رئيس او د فوټسال ملي کمېټې تخنیکي مرستیال حاجي فرید یوسفزي، نوي ټاکل شوي روزونکي او د ۱۷ کلنو کم عمره فوټسال ملي لوبډلې نوو فني غړو هم ګډون درلود.
ښاغلي بهروز جعفري د يادې لوبډلې د روزونکي په توګه د روان میلادي کال تر ختمېدو پورې رسمي قرارداد لاسلیک کړ، جعفري په خپله وینا کې د ژمنتیا، پرلپسې هڅو او هدفمندو پلانونو د جوړونې له لارې د يادې لوبډلې د پرمختګ او چمتووالي پر ارزښت ټینګار وکړ.
