کابل؛ د افغانستان فوټبال درېیم پړاو غوره لیګ سیالیو په لړ کې د کندهار عینو مېنې لوبډلې استقلال کابل لوبډلې ته ماتې ورکړه
د افغانستان د بدني رونې او ورزش لوی ریاست په مرسته او د افغانستان د فوټبال ملي فدراسیون له لوري د فوټبال اتلانو غوره لیګ درېیم پړاو سیالیو په لړ کې چې تېره ورځ د ۱۲ لوبدلو ترمنځ پیل شوې، د کندهار عینو مېنې لوبډلې د استقلال کابل لوبډلې ته د ۳-صفر ګولونو په توپیر ماتې ورکړه.
همدارنګه د دغه لیګ څلورمه او د نن ورځې دویمه لوبه د سرپل ولایت خدیم اف سي او اټک انرژۍ لوبډلو ترمنځ ترسره شوه، چې په پایله کې اټک انرژۍ لوبډلې خپلې سیالې لوبډلې ته د ۳ـ۰ ګولونو په توپیر ماتې ورکړه او بریا یې خپله کړه.
د نن ورځې لومړۍ سیالي د یاد غوره لیګ درېیمه سیالي وه، چې پکې د عینو مېنې لوبډلې لوبغاړي احمد نبي مقدس د خپلې لوبډلې په ګټه ۲ ګولونه ترسره کړل او د لوبې غوره لوبغاړی وټاکل شو.
هېره دې نه وي چې د دغو سیالیو لیدو ته د فوټبال ملي فدراسیون او ورزش ادارې پر فني او مسلکي معاون سربېره ګڼ نندارچیان او د ورزش مینوال هم راغلي وو.
