کابل؛ د رزمي ورزشونو په دوو سبکونو کې د کابل منتخبې لوبډلې ته ټاکل شوي لوبغاړي وستایل شول
د کابل ولایت بدني روزنې او ورزش ریاست په همکارۍ د رزمي ورزشونو ملي فدراسیون له لوري د روانې میاشتې په ۱۹مه او۲۰مه نېټه، د دې رشتې په دوو سبکونو سیلف ډیفینس او توان کې د کابل ولایت د زونونو له ۴۰ کلبونو څخه د ۳۱۰ لوبغاړو ترمنځ د کابل ولایت منتخبې لوبډلې ته د غوره لوبغاړو موندلو په موخه ټاکنیزې سیالې ترسره شوې، چې غوره لوبغاړي یې نن د المپیک ملي کمېټې د کنفرانسونو په تالار کې د یوې غونډې په ترڅ کې وستایل شول.
په دې سیالیو کې ۳۱۰ ورزشکارانو په څلورو عمري کټګوریو کوچنیانو، نوي ځوانانو، ځوانانو او لویانو کې په دوه جلا سبکونو سیلف ډیفینس او توان کې د یو بل پر وړاندې سیالۍ ترسره کړې.
د دې سیالیو په پای کې د سیلف ډیفینس سبک د ۱۶۰ ګډون کونکو له ډلې ۴۰ تنه وتوانېدل، چې د کابل منتخبې لوبډلې ته لار ومومي او د توان سبک د ۱۵۰ ورزشکارانو له ډلې بیا ۵۰ تنو وکولی شول، چې د کابل منتخبې لوبډلې ته غوره شي.
د یادونې وړ ده، چې په دې سیالیو کې لومړی، دویم او درېیم مقام ګټوونکي لوبغاړي د رزمي ورزشونو د فدراسیون د مسوولینو له لوري د مډالونو او ستاینلیکونو په ورکړې سره وستایل شول.
