کابل؛ د سنوکر کلبونو له ۱۰۰ زياتو مالکينو سره د سنوکر اصلاحي اصولو د عملي کولو ناسته وشوه
د المپيک، بدني روزنې او ورزش عمومي رياست اړوند د دعوت ارشاد رياست، امر بالمعروف وزارت او سنوکر ملي فدراسيون په ګډه همغږۍ، د هېواد سنوکر کلبونو لپاره د ټاکل شویو اصلاحي اصولو د پلي کولو په موخه د کابل ښار د سنوکر کلبونو له ۱۰۰ زياتو مالکينو سره ناسته وشوه.
په دغه ناسته کې د ياد رياست ورزشي سلاکار او د همدې فدراسيون فني معاون ګلاب الدين خپلواک، د ياد فدراسيون رئيس وحيدالله اصغري او د کابل ښار د کلبونو مالکينو او د سنوکر لوبغاړو ګډون کړی و.
په پيل کې د المپيک بدني روزنې او ورزش عمومي رياست ورزشي سلاکار ګلاب الدين خپلواک ګډونوالو ته ښه راغلاست ووايه او اړوندو نويو اصلاحي اصولو پر اړه يې خبرې وکړې ويې ويل: دغه اصول د سنوکر لوبو ته د مثبت چاپېریال رامنځته کول، د اسلامي ارزښتونو رعایت، د ځوانانو سالم مصروفيت او د ټولنيزو اصولو په پلي کولو کې خورا مهم دي او بايد پاملرنه ورته وشي.
هېره دې نه وي چې دا اصلاحي اصول د ورزش ادارې د دعوت و ارشاد ریاست، د سنوکر ملي فدراسيون او د امر بالمعروف محترم وزارت ترمنځ د همغږۍ او ګډ کار يوه بېلګه ګڼل شوې او د کلبونو مسولينو وعده وکړه، چې دغو اصولو ته به ژمن پاتیږي او د يادو اصولو تر چتر لاندې به خپلو لوبو ته دوام ورکوي.
