کابل؛ د ۱۲ لوبډلو ترمنځ د فوټبال سیالۍ د اردو لوبډلې په اتلولۍ پای ته ورسېدې
د کابل ولایت د فوټبال فدراسیون او د دغه ولایت د بدني روزنې او ورزش ریاست په همکارۍ د مهاجرې مور د خندا اتلولۍ جام تر سرلیک لاندې د فوټبال پیل شوې سيالۍ، چې ۱۶ ورځې يې دوام وکړ د اردو لوبډلې په اتلولۍ پای ته ورسېدې.
د دغو سیاليو پايلوبې ته د اردو او یورش بګرام لوبډلو لاره موندلې وه، چې په پايله کې ياده لوبه د اصلي وخت په پای کې ۱-۱ مساوي ختمه شوه؛ خو د پنالټي شوټونو پر مهال، اردو لوبډلې خپلې سيالې لوبډلې ته د ۳-۲ ګولونو په توپير ماتې ورکړه او اتلولي يې خپله کړه.
د دغو سیالیو د پايلوبې په مراسمو کې د المپيک، بدني روزنې او ورزش عمومي رييس مولوي احمدالله وثیق، د ياد رياست فني او مسلکي معاون حافظ احمد جان ځدران، د ا. ا. ا د وياند مرستيال مولوي حمدالله فطرت، ورزشي مشاور قاري حیاتالله رحماني، د کابل ولایت د فوټبال فدراسیون رییس حاجي فريد يوسفزي، د لوبډلو مسولینو، ورزشکارانو او د فوټبال يو شمېر مینهوالو ګډون کړی و.
هېره دې نه وي، چې د دغو سیالیو موخه د راستنوونکو مهاجرینو سره خواخوږي څرګندول او د هغوی پر شونډو خوشالي راوستل یاد شوي او په پای کې ګټونکو لوبډلو او غوره لوبغاړو ته چمتو شوې ډالۍ ورکړل شوې.
