کابل؛ په ده سبز ولسوالۍ کې د ۵۰ موټرسايکل ځغلوونکو ترمنځ د موټر سايکل ځغلونې سيالۍ وشوې
د المپيک ، بدني روزنې او ورزش عمومي رياست اړوند موټرسايکل ځغلونې ملي فدراسيون له لوري په ده سبز ولسوالۍ کې د ۵۰ موټرسايکل ځغلوونکو ترمنځ د موټرسايکل ځغلونې سيالۍ وشوې.
د دغو سياليو د پيل په مراسمو کې د المپيک، بدني روزنې او ورزش عمومي رييس مولوي احمدالله وثيق، د ياد رياست فني او مسلکي مرستيال حافظ احمد جان ځدران، د موټرسايکل ځغلونې ملي فدراسيون رئيس سيد نبي الله سادات، ورزشکارانو او د ورزش مينوالو ګډون کړی و.
دغه سيالۍ په دوه کيلو متره واټن کې وشوې، چې په پايله کې په سرعتي سبک کې شفيع الله هاشمي لومړی، محمد صبور محمدزي دويم او عبدالجبار حسين خېل درېيم مقام خپل کړ، همدارنګه په فري سټايل کې سيد سميع الله سادات د کابل په کچه د غوره فري سټايلر لقب خپل کړ.
د يادونې وړ ده چې د دغو سياليو په پای کې د موټر سپورټ ورزشي نندارې هم ترسره شوې.
