کابل کې د اسلامي همکاریو د سازمان مرستيال او کابل کې د اندونیزیا د سفير مرستيال د فوټبال ملي فدراسيون له رييس سره وليدل
کابل کې د اسلامي همکاریو د سازمان(OIC) مرستيال ښاغلي خليل ابراهيم اوکور او کابل کې د اندونیزیا سفارت د سفير مرستيال ريکي سوباگجا د افغانستان فوټبال ملي فدراسيون له رييس محمد يوسف کارګر او رهبرۍ غړو سره د هغه په کاري دفتر کې وليدل.
په دغه ليدنه کې، د فوټبال ملي فدراسيون رييس ښاغلي کارګر، دواړو مرستيالانو ته د ښه راغلاست ترڅنګ، په افغانستان کې د ورزش د ودې او پر مختګ په اړه هر اړخيز معلومات وړاندې کړل او له اسلامي هېوادونو يې په افغانستان کې د ورزش د ودې په برخه کې د همکارۍ او ملاتړ غوښتنه وکړه.
کابل کې د اسلامي همکاریو د سازمان مرستيال ښاغلي اوکور، په افغانستان کې د ورزش د ودې او پرمختګ لپاره ترسره شوې هڅې وستايلې او د هر ډول ګډو همکاريو ډاډ يې ورکړ.
همدارنګه کابل کې د اندونیزیا هېواد د سفارت د سفير مرستيال ښاغلي ريکي سوباګجا وويل، چې موږ د تل په څېر له افغانستان سره د سپورټ په برخه همکارۍ او ملاتړ ته دوام ورکوو.
د يادې ليدنې په پای کې د افغانستان فوټبال ملي فدراسيون رييس محمد يوسف کارګر دواړو مرستيالانو ته د افغانستان فوټبال ملي لوبډلې لباس او نښان ډالۍ کړل او د دوی له راتګ او ملاتړ يې مننه وکړه.
