کابل کې د بډمنټون اتلولۍ سیالۍ پیل شوې
د المپيک بدني روزنې او ورزش عمومي رياست په مرسته، د بډمنټون ملي فدراسیون له لوري او د نجيب تلاش خيريه بنسټ په مالي ملاتړ د کابل ولايت د ۴ منتخبو لوبډلو د ۱۰۰ زياتو ورزشکارانو ترمنځ د نجيب تلاش، کابل ولايت د ۲۰۲۶ کال د بډمنټون اتلولۍ سیالۍ د ياد رياست په دوه زره ۵۰۰ کسيز جمنازيوم کې د بهرنیو ډيپلوماتانو په شتون کې پيل شوې.
دغه سيالۍ چې په پنځو عمري کټګوريو ( ۱۳, ۱۵, ۱۷, ۱۹ او ۲۰+ کلنو) کې پيل شوې، په لومړۍ لوبه کې يې محمد صادق بارکزي، خپل سیال احمد فهيم ضیايي ته د ۲ - صفر ميدانونو په توپير ماته ورکړه او لومړۍ بریا يې په خپل نوم کړه.
د دې سياليو د پيل په مراسمو کې د هېواد ورزش ادارې عمومي رئيس مولوي احمد الله وثیق، ټولو راغلو کورنيو او بهرنيو ميلمنو ته د ښه راغلاست ترڅنګ د هېواد ورزش ادارې د ښې پاملرنې او کوښښونو له امله په نړيوالو ميدانونو کې د ورزشکارانو د وروستيو لاسته راوړنو يادونه وکړه او دغه لاسته راوړنې يې د هېواد د ورزش په تاريخ کې بې سارې وبللې.
دغه راز نوموړي زیاته کړه، چې د هېواد ورزش اداره به په راتلونکو نړيوالو سياليو کې د ورزشکارانو کلک ملاتړ کوي؛ ترڅو ښې پايلې ترلاسه کړي.
دغه راز په کابل کې د روسيې سفارت د سياسي چارو رئيس رومان شېدروف، د بډمنټون لوبه د زغم او چټک غبرګون لوبه وبلله او د ا.ا.ا، د هېواد د ورزش ادارې له مشرتابه او ددې سياليو له تنظیمونکو څخه يې د دې سياليو له برابرولو له امله مننه وکړه.
د ويلو ده، چې دغه سيالۍ د هېواد ورزش ادارې پر رهبرۍ سربېره، د ا.ا.ا د مرستيال وياند ملا حمد الله فطرت، د روسيې، ترکيې او د اسلامي هېوادونو د همکاریو سازمان د استازو، د نجيب تلاش خيريه بنسټ رهبرۍ، د بډمنټون ملي فدراسیون د رهبرۍ، ورزشکارانو او نورو ورزشي مسؤلینو په شتون کې پيل شوې، چې پينځه ورځې به دوام وکړي.
