کابل کې د مرکزي زون د ولایتونو ترمنځ د فوټبال د اتلولي سیالۍ پای ته ورسېدې
د المپیک، بدني روزنې او ورزش ریاست اړوند د کابل فوټبال فدراسیون له لوري د مرکز زون د پنځو غوره لوبډلو ترمنځ د فوټبال اتلولي سیالۍ د کابل ګلرنګ لوبډلې په اتلولي پای ته ورسېدې.
په دغو سیالیو کې عقابان پنجشیر، امید فردای کاپیسا، شاهین برکي راجان، آزادی شهرستان دايکندی او ګلرنګ کابل لوبډلو ګډون کړی و، چې په پایلوبه کې یې کابل ګلرنګ لوبډلې د ٢/٠ ګولونو په توپیر خپلې سیالې آزادی شهرستان دايکندي لوبډلې ته ماتې ورکړه او د دغو سیالیو اتلولي یې وګټله.
د سیالیو د پای په مراسمو کې د المپیک، بدني روزنې او ورزش عمومي ریاست فني او مسلکي مرستیال حافظ احمدجان ځدران، د فوټبال فدراسیون رئیس محمد یوسف کارګر، د روشن مخابراتي شرکت استازي او د ورزش ګڼو مینوالو ګډون کړی و.
دغه سيالۍ د روانې چنګاښ میاشتې په اتمه نېټه د کابل په غازي سټډیوم کې پیل شوې وې، چې پنځه ورځې یې دوام وکړ او په پای کې اتلې لوبډلې ته د اتلولي ګپ او غوره لوبغاړو ته بېلابېلې ډالۍ ورکړل شوې.
