کابل کې د کلاسيک پاورليفټينګ اتم پړاو ټاکنيزې سيالۍ پيل شوې
د کابل ولايت د بدني روزنې او ورزش رياست اړوند د پاورليفټينګ او مردان اهنين ملي فدراسيون له لوري د کابل ښار له اته کلبونو څخه د ۸۵ ورزشکارانو ترمنځ د کلاسيک پاورليفټينګ ټاکنيزې سيالۍ پيل شوې.
په دغوو سیاليو کې به ورزشکاران په څلورو وزني کټګوريو له ۵۳ څخه تر مثبت ۱۲۰ کيلوګرامه وزن کې سیالي ترسره کړي، چې په پايله کې به يې ۳۶ تنه د کابل ولايت د کلاسيک پاورليفټينګ منتخبې لوبډلې ته وټاکل شي.
د دې سياليو د پيل په مراسمو کې د کابل ولايت د بدني روزنې او ورزش رياست رئيس مولوي عتيق الله خالد، د پاورليفټينګ فدراسيون مسوولينو، ورزشکارانو او ګڼ شمير مينوالو ګډون کړی و.
هېره دې نه وي، چې دغه سيالۍ د کابل ولايت د کلاسيک پاورليفټينګ منتخبې لوبډلې ته د غوره لوبغاړو ټاکلو په موخه پيل شوې، چې درې ورځې به دوام وکړي.
