کابل کې د ګراسروټ فوټبال سیالۍ د هندوکش شمال B لوبډلې په اتلولي پای ته ورسېدې
د ٢٠٢٥ کال ګراسروټ (پایه) فوټبال ټورنمنټ چې د فوټبال ملي فدراسیون له له لوري یوه میاشت مخکې د ١٨ لوبډلو ترمنځ پیل شوې وې، د هندوکش شمال B لوبډلې په اتلولي او د تنکیو ځوانانو ملي لوبډلې ته د ۵۰ ورزشکارانو په ټاکلو سره پای ته ورسېدې.
دا سیالۍ د ١٠، ١١ او ١٢ کلنو ورزشکارانو په عمري کټګوریو کې ترسره شوې، چې پایلوبه یې د هندوکش شمال B او اتفاق کابل لوبډلو ترمنځ ترسره شوه او په پایله کې هندوکش شمال B لوبډلې د ٣/١ ګول په توپیر خپلې سیالې لوبډلې ته ماتې ورکړه او اتلولي یې خپله کړه.
د یادو سیالیو د پای په مراسمو کې د المپیک، بدني روزنې او ورزش فني او مسلکي مرستیال حافظ احمدجان ځدراڼ، په کابل کې د اندونیزیا د سفارت استازي ریکي سوبکجاو، په کابل کې د اسلامي همکاري سازمان مرستیال خلیل ابراهیم اوکور، د فوټبال فدراسیون رئیس محمد یوسف کارګر، د المپیکي چارو رئیس داد محمد پاینده اختري، د کابل فوټبال فدراسیون رئیس فرید احمد يوسفزي، د اطلاعاتو او عامه پوهاوي رئیس اتل مشواڼي، د فوټبال فدراسیون مسؤولانو او ورزشکارانو ګډون کړی و.
د سیالیو په پای کې د اتفاق کابل لوبغاړی حمزه کاکړ د ټورنمنټ غوره لوبغاړي، د طلوع لوبډلې لوبغاړی سروش د زړور لوبغاړي، بنیامین د غوره ګول وهونکي او ايمل صدیقي د غوره ګول ساتونکي په توګه ونومول شو.
د یادونې وړ ده چې په دغو سیالیو کې اتفاق کابل لوبډلې دویم او آزادګان لوبډلې بیا درېیم مقام ترلاسه کړ چې د فوټبال فدراسیون له لوري مډالونه او نورې ډالۍ ورکړل شوې.
