کابل کې د ۱۲۰ ورزشکارانو ترمنځ د تکواندو نویو ځوانانو دولسم پړاو ټاکنیزې سیالۍ پيل شوې
د المپیک، بدني روزنې او ورزش عمومي ریاست اړوند د تکواندو ملي فدراسیون له لوري د کابل ښار له ۲۰ ورزشي کلبونو څخه د ۱۲۰ ورزشکارانو ترمنځ د تکواندو نویو ځوانانو دولسم پړاو ټاکنیزې سیالۍ پيل شوې، چې دوې ورځې به دوام وکړي.
دغه سیالۍ به د نویو ځوانانو په عمري کټګورۍ او په ۱۰ بېلا بېلو وزني کټګوریو کې ترسره شي، چې په پایله کې به ۴۰ غوره ورزشکاران د کابل ښار د تکواندو نویو ځوانانو منتخبې لوبډلې ته وټاکل شي.
د دغو سیالیو په پرانیستغونډه کې د المپیک، بدني روزنې او ورزش عمومي رئیس مولوي احمد الله وثیق، د یاد ریاست فني او مسلکي مرستیال حافظ احمد جان ځدراڼ، د یاد ریاست په پوهنتونو، ښوونځیو او مدرسو کې ورزش ته د ودې ورکولو رئیس داد محمد ناوک، د تکواندو ملي فدراسیون د رهبري غړو او ورزشکارانو ګډون کړی وو.
په دغو مراسمو کې د المپيک، بدني روزنې او ورزش عمومي رئیس احمد الله وثیق د کابل ښار د تکواندو نویو ځوانانو سیالیو کې د غوره ورزشکارانو د موندنې په موخه د دغه ډول سیالیو په ترسراوي خوښي څرګنده کړه او د ورزشکارانو د بریا غوښتونکی و.
همدارنګه ښاغلي وثیق ټینګار وکړ، چې د هېواد ورزش ادره په همدې هڅه کې ده؛ ترڅو ورزش په ټول هېواد کې وده وکړي او د ورزشکارانو ملاتړ د ورزش ادارې یو له مهمو لومړیتوبونو څخه دی.
یادې سیالۍ به د کابل ښار د تکواندو نویو ځوانانو منتخبې لوبډلې ته د غوره ورزشکارانو د موندلو او د المپیک تکواندو ځوانانو په سیالیو کې د نثار احمد عبدالرحیمزي له لوري افغانستان ته د لومړي مډال را وړولو په ویاړ ترسره شي.
