کابل کې د ۲۰ لوبډلو ترمنځ د پهلوانۍ لومړي پړاو غوره ليگ ټاکنيزې سيالۍ پيل شوې
د المپيک، بدني روزنې او ورزش عمومي رياست سره په همغږۍ د پهلوانۍ ملي فدراسیون له لوري د هېواد له مرکز او ولايتونو څخه د ۲۰ لوبډلو ترمنځ د پهلوانۍ لومړي پړاو غوره ليگ ته د غوره لوبډلو موندلو په موخه د پهلوانۍ ټاکنيزې سيالۍ د ياد رياست په ۲۵۰۰ کسيز جمنازيوم کې پيل شوې.
دغه سيالۍ، چې د لويانو په عمري کټګورۍ او بېلابېلو وزني کټګوريو کې پيل شوې او درې ورځې به دوام وکړي، په پايله کې به يې ۸ غوره لوبډلې د پهلوانۍ لومړي پړاو غوره ليګ سياليو ته لار ومومي.
ټاکل شوې، چې د پهلوانۍ لومړی پړاو غوره ليګ به د روانې جولای مياشتې پر ۲۵مه نېټه د ۸ لوبډلو په ګډون پيل شي.
