کابل کې د ۲۷۵ ورشکارانو ترمنځ د کابل ښار د نویو ځوانانو د سوک وهنې ټاکنیزې سیالۍ پای ته ورسېدې
د المپیک، بدني روزنې او ورزش عمومي ریاست اړوند د سوک وهنې ملي فدراسیون له لوري د مرکز له څلورو زونونو د ۲۷۵ ورشکارانو ترمنځ د کابل ښار د نویو ځوانانو د سوک وهنې ټاکنیزې سیالۍ پای ته ورسېدې.
دغه سیالۍ په ۱۳ بېلا بېلو کټګوریو کې ترسره شوې، چې په پایله کې ۲۶ تنه ورزشکارانو خپلو سیالانو ته په پرلپسې ماتې ورکولو سره بریاوې خپلې کړې او د کابل ښار د نویو ځوانانو د سوک وهنې منتخبې لوبډلې ته وټاکل شول.
د دغو سیالیو د پای مراسمو ته د المپيک، بدني روزنې او ورزش عمومي رئیس مولوي احمد الله وثیق، د یاد ریاست فني او مسلکي مرستیال حافظ احمد جان ځدراڼ، د سوک وهنې ملي فدراسیون د رهبري غړي، سوک وهونکي او زیات شمېر مینوال راغلي وو.
د یادو سیالیو موخه د کابل ښار د نویو ځوانانو منتخبې لوبډلې ته د غوره ورزشکارانو موندل و، د سیالیو په پای کې غوره ورزشکارانو ته کپ، مډالونه او ستاینلیکونه ورکړل شول.
