کابل کې د ۴۰۰ ورزشکارانو ترمنځ د کابل ښار د پهلوانۍ ټاکنیزې سیالۍ پيل شوې
د المپيک، بدني روزنې او ورزش عمومي ریاست اړوند د پهلوانۍ ملي فدراسیون د استازولۍ له لوري د یاد ریاست په ۲۵۰۰ کسیز جمنازیوم کې د کابل ښار له ټولو زونونو کلبونو څخه د ۴۰۰ ورزشکارانو ترمنځ د کابل ښار پهلوانۍ ټاکنیزې سیالۍ پيل شوې، چې شپږ ورځې به دوام وکړي.
دغه سیالۍ به د ( ۱۲،۱۳،۱۴،۱۵ ) کلونو ورزشکارانو ترمنځ د نویو ځوانانو او ځوانانو په عمري کټګوریو کې ترسره شي، چې په پایله کې به له هرې کټګورۍ ۴۰ ورزشکاران، چې ټول ۸۰ ورزشکاران کېږي د کابل ښار د نویو ځوانانو او د ځوانانو ورزشکارانو د پهلوانۍ منتخبو لوبډلو ته وټاکل شي.
د یادو سیالیو موخه د کابل ښار د نویو ځوانانو او د ځوانانو ورزشکارانو د پهلوانۍ منتخبو لوبډلو ته د غوره پهلوانانو موندل دي، چې راتلونکو کې به ملي سیالۍ کې هم ګډون وکړي.
