کابل کې د ۷۰ لوبډلو ترمنځ د فوتسال سیالۍ پای ته ورسېدې
د المپیک، بدني روزنې او ورزش عمومي ریاست اړوند د فوټبال فدراسیون د فوټسال کمېټې له لوري د کابل ښار محمد باقر په ورزشي جمنازیوم کې د ۷۰ لوبډلو ترمنځ د فوټسال سیالۍ د یاران عطايي لوبډلې په اتلولي پای ته ورسېدې.
د یادو سیالیو پایلوبه کې یاران عطايي لوبډلې د ۳ پر ۲ ګولونو به توپیر خپلې سیالې لوبډلې ته ماتې ورکړه او اتلولي یې وګټله.
د سیالیو د پای په مراسمو کې د ورزش ادارې عمومي رئیس مولوي احمدالله وثیق، د یاد ریاست فني او مسلکي مرستیال حافظ احمدجان ځدراڼ، ورزشي سلاکار قاري حیات الله رحماني، د فوټسال کمېټې فني مرستیال محمد فرید یوسفزي او د ورزش ګڼو مینوالو ګډون کړی و.
د ورزش ادارې عموموي رئیس مولوي احمدالله وثیق د دغو سیالیو د پای په مراسمو کې د دا ډول سترو سیالیو په ترسره کېدو خوښي وښوده او ورزش یې د ملي یووالي او ورورولي سمبول یاد کړ.
ښاغلي وثیق همداراز له ورزشکارانو سره ژمنه وکړه، چې په هر حالت کې به د دوی ملاتړ کوي او هېڅ ډول مرستې چې د دوی په توان کې وي؛ له ورزشکارانو به یې نه درېغوي.
نوموړي په پای کې یادونه وکړه، چې په اوس وخت کې د افغانستان ورزش ښه وده کړې ده او له دې سره- سره به لا هڅه کوو، چې د هېواد ګوټ ګوټ ته ورزش ورسوو.
د خپلواک جام په نوم د فوټسال دفه سیالۍ د ورزشکارانو ترمنځ د یووالي په موخه ترسره شوې، چې دوې میاشتې یې دوام وکړ.
