کام اير والیبال لوبډلې عقاب بابه او سرې میاشتې لوبډلې افغان ملي ته ماتې ورکړه
د افغانستان واليبال غوره ليګ څلورم پړاو سياليو په اوومه ورځ، کام ایر لوبډله د عقاب بابه پر وړاندې او افغان ملي لوبډله د سرې مياشتې لوبډلې پر وړاندې د سيالۍ ډګر ته ښکته شوه.
د دې سياليو د اوومې ورځې لومړۍ لوبه د کام ایر او عقاب بابه لوبډلو ترمنځ وشوه، چې په پايله کې يې کام اير لوبډلې وکولی شول، خپلې سيالې عقاب بابه لوبډلې ته د ۳ - ۰ ميدانونو په توپير ماتې ورکړي او په روانو سياليو کې د پرلپسې درېيمې بريا ترڅنګ د دې سياليو نيمه پايلوبې ته لار ومومي.
د دې سيالۍ د غوره لوبغاړي جايزه حبيب يوسفي ترلاسه کړه.
دغه راز دويمه لوبه يې د افغان ملي او سرې مياشتې لوبډلو ترمنځ وشوه، چې په پايله کې يې سرې مياشتې لوبډلې خپلې سيالې لوبډلې ته د ۳ - ۰ ميدانونو په توپير ماتې ورکړه او په روانو سياليو کې يې دويمه بريا خپله کړه. د دې لوبې د غوره لوبغاړي جايزه شاهد بدلون وګټله.
د يادو سياليو په لړ کې به سبا ( يکشنبه، د غبرګولي څلورمه ) دوې لوبې ترسره شي، چې لومړۍ لوبه به يې ماسپښين ۰۲:۰۰ بجې د خوست سهيلي بازانو او نګين هريوا ترمنځ او دويمه لوبه به يې مازيګر ۰۴:۰۰ بجې د ستاره او پامير لوبډلو ترمنځ ترسره شي.
د يادونې وړ ده، چې يادې سيالۍ د هېواد د المپيک، بدني روزنې او ورزش عمومي رياست په همکارۍ د واليبال ملي فدراسيون له لوري د ۱۰ لوبډلو ترمنځ د روان کال د غويي مياشتې پر ۲۸ مه نېټه د دې رياست په ۲۵۰۰ کسيز جمنازيم کې پيل شوي، چې د غبرګولې مياشتې تر ۹مې نېټې به دوام وکړي.
