کندز؛ دوراهي آمو لوبډلې د فوټبال غوره ليگ سياليو اتلولي وگټله
د کندز ولايت د بدني روزنې او ورزش رياست په همغږۍ، د فوټبال فدراسيون د استازولۍ له لوري د امام صاحب ولسوالۍ په شېرخان بندر کې د لسو لوبډلو ترمنځ د فوټبال غوره ليگ سيالۍ د دوراهي آمو لوبډلې په اتلولۍ پای ته ورسېدې.
د يادو سياليو په پايله کې دوراهي آمو لوبډلې د ۴۳ امتيازونو په خپلولو سره لومړی او شېرخان بندر لوبډلې د ۴۱ امتيازونو په ترلاسه کولو سره دويم مقام خپل کړ.
دا سيالۍ د ځوانانو لپاره د سالمې تفريح برابرولو او د نويو استعدادونو موندلو په موخه وشوې، چې شاوخوا دوې مياشتې يې دوام وکړ.
