کندز ؛ امام صاحب ولسوالۍ کې د ۶۰ ورزشکارانو ترمنځ د کيک جيتسو سیالۍ ترسره شوې
د کندز ولايت د بدني روزنې او ورزش رياست اړوند د رزمي ورزشونو فدراسيون د استازولۍ له لوري د یاد ولایت په امام صاحب ولسوالۍ کې د ۶۰ ورزشکارانو ترمنځ د کیک جیتسو دوستانه سيالۍ ترسره شوې.
دغه سيالۍ د نويو ځوانانو، ځوانانو او لويانو ورزشکارانو په عمري کټګوريو کې ترسره شوې، چې په پايله کې ۳۰ ورزشکارانو خپلو سيالانو ته په ماتې ورکولو سره برياوې خپلې کړې.
دا سیالۍ د کیک جیتسو سبک راتلونکو ټاکنیزو سیالیو ته د غوره ورزشکارانو موندلو په موخه ترسره شوې، چې یوه ورځ یې دوام وکړ او په پای کې غوره ورزشکارانو ته مډالونه او ستاينليکونه ورکړل شول.
