کندز کې د ۳۰ ورزشکارانو ترمنځ د کونګفو سیالۍ ترسره وشوې
د کندز ولایت د بدني روزنې او ورزش ریاست اړوند د کونګفو فدراسیون د استازولۍ له لوري د یاد ولایت په مرکز کې د ۳۰ ورزشکارانو ترمنځ د تنکیو ځوانانو، نویو ځوانانو، ځوانانو او د لویانو ورزشکارانو په عمري کټګوریو کې د کونګفو سیالۍ وشوې.
دغه سیالۍ، چې د تک فایټ په ډول ترسره شوې، په پایله کې ۱۵ ورزشکارانو خپلو سیالانو ته په ماتې ورکولو سره بریاوې او لومړي مقامونه یې ترلاسه کړل.
د یادو سیالیو موخه د کونګفو ورزش ته وده ورکول او د ورزشکارانو ظرفیت لوړول و، چې یوه ورځ یې دوام وکړ.
د سیالیو په پای کې غوره ورزشکارانو ته مډالونه او ستاینلیکونه ورکړل شول.
