کندز کې د ۷ لوبډلو ترمنځ د واليبال سيالۍ ترسره شوې
کندز ولایت د بدني روزنې او ورزش رياست اړوند د واليبال ملي فدراسيون د استازولۍ له لوري او د رويال کينګ تجارتي شرکت په مالي ملاتړ د ياد ولايت په مرکزي جمنازيوم کې د ۷ لوبډلو ترمنځ د واليبال سيالۍ ترسره شوې.
د دغو سياليو په پايلوبه کې د کندز مرکز منتخبې لوبډلې خپلې سیالې امام صاحب ولسوالۍ د حبيب الله لوبډلې ته د ۳۱/۲۸ نومرو په توپير سره ماتې ورکړه او اتلولي يې وګټله.
د يادو سياليو موخه ورزش ته د ځوانانو هڅول و، چې يوه ورځ يې دوام وکړ او په پای کې د رويال کينګ تجارتي شرکت له لوري لومړی مقام ګټونکي لوبډلې ته ۳۰۰ امريکايي ډالر او دوهم مقام ګټونکي لوبډلې ته ۱۰۰ امريکايي ډالر د انعام په توګه ورکړل شول.
