کندهار؛ د دامان ولسوالۍ د ټېپ بال کرکټ سیالیو اتلولي اڅکزي کاروان لوبډلې وګټله
د کندهار ولایت په دامان ولسوالۍ کې د ټېپ بال کرکټ لس اوریزې سیالۍ، چې لسو لوبډلو پکې ګډون کړی و، اتلولي يې اڅکزي کاروان لوبډلې وګټله.
د دغو سیالیو پایلوبې ته شمس الله اکاډمۍ او اڅکزي کاروان لوبډلو لار موندلې وه، چې په پیل کې شمس الله اکاډمي لوبډلې د لسو اورونو په لوبولو سره سیالې لوبډلې ته ۱۴۱ منډې هدف کېښود، بل پلو اڅکزي کاروان لوبډلې یاد هدف د څلورو لوبغاړو په سوځېدو سره په اتم اور کې پوره کړ او اتلولي یې وګټله.
د یادې لوبې غوره لوبغاړی سردار محمد جان و، چې د خپلې لوبډلې په ګټه یې د مقابلې لوبډلې ۳ لوبغاړي وسوځول او ترڅنګ یې ۴۲ چټکې منډې هم جوړې کړې.
د یادونې وړ ده چې په پای کې غوره لوبډلو او لوبغاړو ته کپونه او مډالونه ورکړل شول.
