کندهار؛ د کرکټ ټېپ بال سيالۍ د اتفاق افغان لوبډلې په بریا پاى ته ورسېدې
د کندهار ولايت د بدني روزنې او ورزش ریاست په مرسته د کرکټ ټېپ بال فدراسیون له لوري په غازي محمد ايوب خان ورزشي لوبغالي کې د کندهار ښار او ولسواليو د ٢٤ لوبډلو ترمنځ د کرکټ ټېپ بال سيالۍ د اتفاق افغان لوبډلې په لومړي او پوپل لوبډلې په دويم مقام ګټلو سره پاى ته ورسېدې.
د دغو سياليو په پايلوبه کې د اتفاق افغان لوبډلې په ټاکلو لس اورونو کې پوپل لوبډلې ته د ١٤٣ منډو هدف ورکړ، چې په مقابل کې پوپل لوبډلې په ټاکلو لسو اورونو کې د ټولو لوبغاړو په سوځېدو ۹۰ منډې وکړې او لوبه یې د ۵۳ منډو په توپیر اتفاق افغان لوبډلې ته بايلوده.
قدرت الله همت د ١٠٧ منډو په کولو سره د پايلوبې او د ٣٧٩ منډو په کولو سره د ټورنمنټ غوره لوبغاړى شو.
همداراز حبيب سادات بيا د ١١ ويکټو په اخيستلو سره د غوره بالر جايزه ترلاسه کړله.
يادو سياليو، چې دوې اوونۍ يې دوام وکړ، موخه يې د کندهار کرکټ ټېپ بال منتخبې لوبډلې ټاکل او ورزش ته د ځوانانو هڅول دي.
په پاى کې غوره لوبډلو ته د ورزشي مسوولینو له لوري کپونه او غوره لوبغاړو ته هم کپونه او جايزې ورکړل شوې.
