کونړ؛ شلتن ولسوالۍ کې لرسنو لوبډلې د ټېپ بال کرکټ سیالیو اتلولي وګټله
د کونړ ولایت د بدني روزنې او ورزش آمریت په مالي ملاتړ د یاد ولایت د شلتن ولسوالۍ چوګام دره کې د ۱۳ لوبډلو ترمنځ د ټېپ بال کرکټ سیالۍ، چې یوه میاشت مخکې پیل شوې وې؛ د لرسنو لوبډلې په اتلولۍ پای ته ورسېدې.
په دغو سیالیو کې چوګام، سره شاه، لرسنو، مدرسې، سپين غر، کربوړۍ، سرکۍ، ونډۍ، پوميزا، باجوړيانو، سرحد او شاهګۍ لوبډلو برخه اخیستې وه، چې پایلوبه یې د لرسنو او ونډۍ لوبډلو ترمنځ ترسره شوه، چې په پایله کې لرسنو لوبډلې د ۴۹ منډو په توپیر سیالې لوبډلې ته ماتې ورکړه او اتلولي یې په خپل نوم کړه.
د پایلوبې مراسمو کې ګڼ شمېر قومي مشرانو، امنیتي ځواکونو او د ورزش مینوالو هم ګډون کړی و، چې په پای کې غوره لوبغاړو ته ورزشي ډالۍ او ستاینلیکونه ورکړل شول.
