کابل؛ د کابل ۱۲۰ ورزشکارانو ترمنځ د ځغاستې پنځم پړاو ټاکنيزې سيالۍ پيل شوې
د المپيک، بدني روزنې او ورزش عمومي رياست اړوند د اتلتيک ملي فدراسیون له لوري د ياد رياست په غازي سټېډیوم کې د کابل په کچه د ۱۲۰ ورزشکارانو ترمنځ له ۱۰۰ مترو څخه تر ۵۰۰۰ زره مترو په بېلا بېلو واټنونو کې د ځغاستې ټاکنيزې سيالۍ پيل شوې.
دغه سيالۍ د نويو ځوانانو، ځوانانو او مشرانو ورزشکارانو په عمري کټګوريو کې پيل شوې، چې په پايله کې به د نويو ځوانانو له کټګورۍ ۲۰ تنه، د ځوانانو له کټګورۍ ۲۵ تنه او د مشرانو ورزشکارانو له کټګورۍ ۳۰ تنه ورزشکاران، چې ټول ۷۵ تنه ورزشکاران کېږي د کابل د ځغاستې منتخبې لوبډلې ته وټاکل شي.
د یادولو وړ ده، چې په دغو سياليو کې د المپيک، بدني روزنې او ورزش عمومي رياست د فني او مسلکي رياست سرپرست حميد الله صافي، د کابل بدني روزنې او ورزش رئیس عتيق الله خالد، د سياليو د دايرولو امر عزيز الرحمن ملنګ او د ځغاستې ورزشکارانو ګډون کړی وو.
د يادو سياليو موخه د کابل د ځغاستې منتخبې ملي لوبډلې ته د غوره ورزشکارانو موندل دي، چې دوې ورځې به دوام وکړي.
