کابل کې د ۲۵۰ ورزشکارانو ترمنځ د ووشو دوستانه سيالۍ پيل شوې
د المپيک، بدني روزنې او سپورټ عمومي رياست اړوند د ووشو ملي فدراسيون له لوري د ياد رياست د ووشو په مرکزي جمنازيوم کې د ژمي جام په نوم د کابل ښار له ۴۰ کلبونو د ۲۵۰ ورزشکارانو ترمنځ د ووشو دوستانه سيالۍ پيل شوې.
د دغو سياليو پرانيستغونډې کې د المپيک، بدني روزنې او سپورټ عمومي رياست فني او مسلکي مرستيال حافظ احمد جان ځدراڼ، د ياد رياست د نشراتو رييس الله محمد اتل مشواڼي، د ووشو فدراسیون مسولینو، ورزشکارانو او زيات شمېر مينوالو ګډون کړی وو.
دغه سيالۍ د نويو ځوانانو، ځوانانو او د لويانو ورزشکارانو ترمنځ له ۴۲ کيلو ګرامه څخه تر ۱۰۰ کيلو ګرامه پورې په بېلابېلو وزني کټګوريو کې پيل شوې.
د يادو سياليو موخه د ووشو ورزش ته وده ورکول دي، چې درې ورځې به دوام وکړي.
