غور؛ شهرک ولسوالۍ کې د ۱۰۰ ورزشکارانو ترمنځ د پهلوانۍ سیمه ییزې سیالۍ ترسره شوې
د غور ولایت د بدني روزنې او ورزش امریت اړوند د کورش ملي فدراسیون د استازولۍ له لوري د یاد ولایت په شهرک ولسوالۍ کې له ۶۰ کیلو ګرام څخه تر ۱۰۰ کیلو ګرام وزن پورې د ۱۰۰ ورزشکارانو ترمنځ د پهلوانۍ سیمه ییزې سیالۍ ترسره شوې، چې یوه ورځ یې دوام وکړ.
دغه سیالۍ، چې د امتیازي په ډول ترسره شوې، په پایله کې ۱۸ ورزشکارانو په خپلو وزنونو کې خپلو سیالانو ته په ماتې ورکولو سره بریاوې او لومړي مقامونه ترلاسه کړل.
د یادو سیالیو موخه د سیمه ییزې پهلوانۍ ورزش ته وده ورکول و؛ د سیالیو په پای کې غوره ورزشکارانو ته چمتو شوې ډالۍ ورکړل شوې.
