کابل کې د اسيا سامبو کورش کنفدراسيون مرستيال د هېواد ورزش ادارې له رهبري سره وليدل
د اسيا سامبو کورش کنفدراسيون مرستيال او د منځنۍ اسیا د سامبو ټولنې رئيس علي شېر عليموف د هېواد ورزش ادارې عمومي رئيس مولوي احمد الله وثیق سره وليدل.
په دغه ليدنه کې مولوي احمد الله وثیق ښاغلي علیموف ته د ښه راغلاست ویلو ترڅنګ د هېواد د ورزش ادارې لاسته راوړنو او فعالیتونو ته اشاره وکړه او د کورش ملي فدراسیون یې د افغانستان له خورا مهمو ورزشي رشتو څخه وباله. نوموړي زیاته کړه، چې دا رشته نه یوازې ډېر مینوال لري؛ بلکې په ملي کچه هم د پام وړ لاسته راوړنې لري.
د يادې ليدنې په دوام، علي شېر علیموف خوښي څرګنده کړه، چې افغانستان ته راغلی او د دغه هېواد د ورزش له مسئولینو سره یې ولیدل او د افغانستان د کورش ملي فدراسیون فعالیتونه یې وستايل.
نوموړي د افغان ورزش ادارې رهبري ته ډاډ ورکړ، چې د اسیا سامبو کورش کنفدراسیون همکاري به د ياد هېواد له کورش فدراسیون سره دوام ومومي.
د يادونې وړ ده، چې په دغه ليدنه کې د المپيک، بدني روزنې او ورزش عمومي رياست فني او مسلکي مرستیال حافظ احمد جان ځدراڼ، د ياد رياست ورزشي مشاور قاري حيات الله رحماني، د المپيکي چارو رئيس داد محمد پاينده اختري او د کورش ملي فدراسيون رئيس احمد ضياء دشتي هم ګډون کړی و.
په پای کې د هېواد د ورزش ادارې عمومي رئیس د اسیا سامبو کورش کنفدراسیون له دایمي همکاریو او د ازبکستان له ملاتړ مننه وکړه. همدارنګه ښاغلي علیموف د کنفدراسیون په استازیتوب د اسیايي سامبو نښه د افغانستان ورزش ادارې ته ډالۍ کړه.
