ننګرهار؛ روداتو ولسوالۍ کې د شپږو لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په روداتو ولسوالۍ کې د شپږو لوبډلو ترمنځ د ټېپ بال کرېکټ سیالۍ د بړو انصاف لوبډلې په اتلولي پای ته ورسېدې.
د یادو سیالیو پایلوبه د سور ډاګ او بړو انصاف لوبډلو ترمنځ ترسره شوه. د لوبې پچه سور ډاګ لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د شپږو ویکټو په زیان خپلې سیالې لوبډلې ته د ٩٦ منډو هدف وټاکه. بړو انصاف لوبډلې ټاکلی هدف د څلورو ویکټو په زیان د لوبې په اتم اور کې ترلاسه کړ او د شپږو ویکټو په توپیر یې د دغو سیالیو اتلولي یې وګټله.
دا سیالۍ ورزش ته د ځوانانو د هڅولو او يووالي په موخه پیل شوې وې، چې دوې اوونۍ یې دوام وکړ.
