هلمند؛ مارجې ولسوالۍ کې د ١٦ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په مارجې ولسوالۍ کې د ١٦ لوبډلو ترمنځ د ټېپ بال کرېکټ سیالۍ د پوپل ستورو لوبډلې په اتلولي پای ته ورسېدې.
د یادو سیالیو پایلوبه د همدرد ستورو او پوپل ستورو لوبډلو ترمنځ ترسره شوه. د لوبې پچه همدرد ستورو لوبډلې وګټله او لومړی یې توپ وهنه وکړه، چې په ټاکلو اتو اورونو کې یې خپلې سیالې لوبډلې ته د ١١٨ منډو هدف وټاکه. پوپل ستورو لوبډلې ټاکلی هدف د دوو ویکټو په زیان د لوبې په اووم اور کې ترلاسه کړ او د اتو ویکټو په توپیر یې د دغو سیالیو اتلولي وګټله.
دا سیالۍ د ځوانانو لپاره د سالمې تفریح برابرولو په موخه ترسره شوې، چې یوه اوونۍ یې دوام وکړ.
