ننګرهار؛ چپرهار ولسوالۍ کې د ۲۰ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په چپرهار ولسوالۍ کې د ۲۰ لوبډلو ترمنځ د ټېپ بال کرېکټ سیالۍ د حاجي ګل لوبډلې په اتلولي پای ته ورسېدې.
د یادو سیالیو پایلوبه د حاجي ګل او امرخېل لوبډلو ترمنځ ترسره شوه. د لوبې پچه حاجي ګل لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د درېیوو ویکټو په زیان خپلې سیالې لوبډلې ته د ۱۵۳ منډو هدف وټاکه. امرخېل لوبډلې هم د هدف په تعقیب کې د شپږو ویکټو په زیان ۱۵۳ منډې وکړې خو په سوپر اور کې حاجي ګل لوبډلې خپلې سیالې امرخېل لوبډلې ته ماتې ورکړه او اتلولي یې وګټله.
دا سیالۍ د ځوانانو لپاره د سالمې تفرېح برابرولو په موخه ترسره شوې، چې دوې اوونۍ یې دوام وکړ.
