پکتیکا؛ مټاخان ولسوالۍ کې د نهو لوبډلو ترمنځ د ټېپ بال کرېکټ سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په مټاخان ولسوالۍ کې د نهو لوبډلو ترمنځ د ټېپ بال کرېکټ سیالۍ د بلال احمد لوبډلې په اتلولي پای ته ورسېدې.
د یادو سیالیو پایلوبه د دوست محمد او بلال احمد لوبډلو ترمنځ ترسره شوه. د لوبې پچه دوست محمد لوبډلې وګټله او لومړی یې توپ وهنه وکړه، چې په ټاکلو څلورو اورونو کې یې د دوو ویکټو په زیان خپلې سیالې لوبډلې ته د ٤٤ منډو هدف وټاکه. بلال احمد لوبډلې ټاکلی هدف د یوې ویکټې په زیان د لوبې په وروستي اور کې ترلاسه کړ او د نهو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې دوې ورځې یې دوام وکړ.
