کابل کې د ۱۳۰ ورزشکارانو ترمنځ د سنتي تکواندو نهم پړاو ملي ټاکنیزې سیالۍ پيل شوې
د المپيک، بدني روزنې او ورزش عمومي ریاست اړوند د تکواندو ملي فدراسیون له لوري د یاد ریاست په ۵۰۰ کسیز جمنازیوم کې د هېواد له ۱۱ ولایتونو څخه د ۱۳۰ ورزشکارانو ترمنځ د سنتي تکواندو نهم پړاو ملي ټاکنیزې سیالۍ پيل شوې.
دغه سیالۍ به د تنکیو ځوانانو، نویو ځوانانو او د ځوانانو ورزشکارانو په عمري کټګوریو کې ترسره شي، چې په پایله کې به ۳۰ ورزشکاران د سنتي تکواندو ملي لوبډلې ته وټاکل شي.
د دغو سیالیو په پرانیستغونډه کې د المپيک، بدني روزنې او ورزش عمومي ریاست فني او مسلکي مرستیال حافظ احمد جان ځدارڼ، د یاد ریاست د نشراتو رئیس اتل مشواڼي، د اسیا او د افغانستان د سنتي تکواندو ملي فدراسیون رئیس ګلاجان وفا او د مرکز او ولایتونو ورزشکارانو ګډون کړی وو.
په دغو مراسمو کې ښاغلي احمد جان ځدراڼ د ملي لوبډلو ټاکنیزو سیالیو د ترسراوي په اهمیت ټینګار وکړ او د ورزش ادارې د وروستیو کلونو کې د لاسته راوړنو په زیاتېدو خبر ورکړ او هیله یې څرګنده کړه، چې د ورزش او د ورزشکارانو کچه به ورځ تر بلې نوره هم لوړه شي.
همدارنګه نوموړي له ورزشکارانو سره د ورزش ادارې د رهبري لوري د همېشنۍ مرستې او ملاتړ ډاډ ورکړه.
د یادو سیالیو موخه د سنتي تکواندو ملي لوبډلې ته د غوره ورزشکارانو ټاکل دي.
