د نویو ځوانانو درېیم پړاو آسیایي سیالیو پر دوام؛ افغان کورشکار روح الله نظري د برنزو مډال ګټونکی شو
د نویو ځوانانو درېیم پړاو آسيايي سیالۍ چې د ٤٥ هېوادونو په ګډون په بحرین کې پیل شوي دي، پر دوام يې افغان کورشکار روح الله نظري د برنزو مډال وګاټه.
ښاغلي نظري په ۸۳ کیلو ګرامه وزن کې خپل قرغیزستاني سیال ته ماتې ورکړه، خو په نيمه پايلوبه کې يې له خپل ايراني سيال ماتې وخوړه او د برنزو مډال يې وګاټه.
د ويلو ده، چې له نظري وړاندې محمد يحيی محمدي هم د دغو سیالیو په ٦٥ کیلو ګرامه وزن کې خپلو ټایلنډي او ترکمنستاني سیالانو ته په ماتې ورکولو د برنزو مډال ګټلی و.
د نویو ځوانانو درېیم پړاو آسيايي سیالۍ د بحرین په کوربتوب له ٤٥ هېوادونو د ٢٠٠٠ ورزشکارانو په ګډون ترسره کېږي، چې له افغانستان څخه په اتو بېلابېلو ورزشي رشتو کې ٣١ تنه ګډون کوي.
