کابل کې د فوټبال غوره لیګ سیالۍ د اردو لوبډلې په اتلولۍ پای ته ورسېدې
د کابل ولايت د بدني روزنې او ورزش رياست په مرسته او د فوټبال ملي فدراسیون له لوري د ورزش ادارې په غازي سټېډیوم کې د کابل فوټبال غوره لیګ سیالۍ، چې د ۹ لوبډلو ترمنځ دوې مياشتې مخکې پیل شوې وې د اردو لوبډلې په اتلولۍ پای ته ورسېدې.
د دغو سياليو په پایله کې اردو لوبډلې د اتو پرلپسې برياوو او ۲۴ امتيازونو په ترلاسه کولو لومړی، سباوون لوبډلې د ۱۹ امتيازونو په ترلاسه کولو سره دويم مقام خپل کړ.
د ځوانانو په برخه کې متحد افغان لوبډلې د زياتو امتيازونو په ترلاسه کولو لومړی او سرې مياشتې لوبډلې بيا دويم مقام خپل کړ او په دغه مقامونه ګټلو سره دواړه لوبډلې د افغانستان مرکزي زون د ځوانانو فوټبال سياليو ته لاره وموندله.
د يادونې وړ ده، چې اردو او سباوون لوبډلو هم په لومړي او دويم مقام ګټلو سره د افغانستان د فوټبال غوره ليګ سياليو ته لاره وموندله.
د دغو سياليو د پای په مراسمو کې د المپيک، بدني روزنې او ورزش عمومي رئيس مولوي احمد الله وثیق، فني او مسلکي مرستیال حافظ احمد جان ځدراڼ، د هېواد د بېلابېلو ادارو رئيسانو او مسؤلينو، د فوټبال ملي فدراسیون مسؤلينو او لوبغاړو ګډون کړی وو.
د يادو سياليو موخه د افغانستان فوټبال غوره لیګ ته د غوره لوبډلو او د هېواد مرکزي زون سياليو ته د ځوانانو غوره لوبډلو موندل وو، د سياليو په پای کې غوره لوبډلو او لوبغاړو ته چمتو شوې ډالۍ ورکړل شوې.
