د هېواد ورزش ادارې رهبري هېواد ته د راستون شوي ورزشکار " ريل کمانډو" سره وليدل
د المپيک، بدني روزنې او ورزش عمومي رياست، عمومي رئيس مولوي احمدالله وثیق، فني او مسلکي مرستيال حافظ احمد جان ځدراڼ او د رهبري غړو، هېواد ته د تازه راستون شوي د ورزش مشهورې او پیژندل شوې څیرې ريل کمانډو سره په خپل کاري دفتر کې وليدل.
په دغه ليدنه کې د هېواد ورزش ادارې عمومي رئيس مولوي احمدالله وثیق، په ریل کمانډو مشهور د رزمي ورزشونو ورزشکار حليم الله صافي ته د ښه راغلاست ترڅنګ، هېواد ته په راتګ خوښي وښوده.
دغه راز ډاډ يې ورکړ، چې د هېواد ورزش اداره به ستاسو ترشاه ولاړه وي او ستاسو ملاتړ به کوي.
همدارنګه د المپيک ملي کمېټې مرستيال باور خان هوتک د نوموړي په راتګ خوښې وښوده او زياته يې کړه، چې کمانډو اوس کولی شي خپلو هېوادوالو او ځوانانو ته خدمت وکړي او له نوموړي څخه يې غوښتنه وکړه چې خپلې تجربې له ورزشکارانو او ځوانانو سره شريکې کړي.
په ورته وخت کې حليم الله صافي( ريل کمانډو)، د هېواد د ورزش ادارې د رهبرۍ له هرکلي او ليدنې مننه وکړه او د ورزش په برخه کې يې د يادې ادارې د کړو خدمتونو ستاينه وکړه او زياته يې کړه، چې زما اراده دا ده، چې، خپلو ټولو ورزشکارانو ته به ښه خدمت کوم او خپل ورزشکاران به نړیوالو سياليو ته چمتو کوم.
د ويلو ده، چې حليم الله صافی، چې په ریل کمانډو مشهور دی، څو لسيزې يې په پاکستان کې په مهاجرت کې تيرې کړي او تازه هېواد ته راستون شوی دی، چې په بېلابېلو ورزشي رشتو کې غوره مهارتونه لري او ګڼ شمېر ورزشکاران او ځوانان يې روزلي دي او په ټولنيزو رسنيو کې زيات شمېر مينوال لري.
