کابل؛ د ووشو اووه کسيزه لوبډله د ووشو اسيايي سياليو کې د ګډون په موخه چين ته ولاړه
د المپيک، بدني روزنې او ورزش عمومي رياست اړوند د ووشو ملي فدراسيون اووه کسيزه لوبډله د چین په کوربتوب د ووشو اسيايي سياليو کې د ګډون په موخه د ورزش ادارې له فني او مسلکي مرستیال حافظ احمد جان ځدراڼ سره تر خدای پاماني وروسته د هوبي ولايت انلو ښار ته ولاړه.
په دغه اووه کسيزه لوبډله کې د ووشو ملي فدراسيون مالي او اداري مرستيال ذبيح الله فاروقي يو پلاوي په ګډون شپږ ورزشکاران ګډون درلود.
دغه سيالۍ به د روان ميلادي کال د جون مياشتې له ۲۴ نېټې څخه تر ۲۸ نېټې پورې د ۵۲ کيلو ګرام څخه تر ۸۰ کيلو ګرام په بېلابېلو وزني کټګوريو کې ترسره شي، چې افغان ورزشکاران به د يادې مياشتې په ۲۷ او ۲۸ نېټه سيالۍ وکړي.
د يادو سياليو موخه د شانګهای همکاريو سازمان ( SCO) غړو، د ووشو په برخه کې د فرهنګي تبادلې د ودې او د چين ووشوي سياليو ټولنې غړو هېوادونو کې د ووشو سياليو ته وده ورکول او دودول دي.
