قدرمن خلیفه صاحب د کورنیو چارو وزارت د فوټبال له لوبډلې او مسولینو سره ولیدل
د کورنیو چارو وزیر محترم خلیفه صاحب د کورنیو چارو وزارت د فوټبال له لوبډلې سره وکتل او د هغوی وروستۍ لاسته راوړنه یې تقدیر کړه. په دې لیدنه کې د ورزش ادارې فني او مسلکي مرستیال حافظ احمد جان ځدراڼ، د کورنیو چارو وزارت د فوټبال لوبډلې رهبري او ورزشکارانو او هم د فوټبال فدراسیون مسولینو شتون درلود.
په دې لیدنه کې د ورزش ادارې فني او مسلکي مرستیال حافظ احمد جان ځدراڼ وويل، چې اوسمهال په افغانستان کې ورزش د پرمختګ په حال کې دی او د ا.ا د مشرتابه د توجه له برکته ورځ تر بلې ورزشي لاسته راوړنې ډېریږي. نوموړي زیاته کړه، چې د سرتاسري سولې او ښه امنیت له برکته په ټول هیواد کې ورزشي فعالیتونو ته زمینه مساعده شوې او هم یې په خبرو کې له محترم خلیفه صاحب څخه ځانګړې مننه وکړه، چې تل یې ورزشکاران تشویق کړي دي.
قدرمن خلیفه صاحب د لوبغاړو د لاسته راوړنو ستاینه وکړه او هغوی ته یې اړینې سپارښتنې وکړې، نوموړي ورزشکاران وهڅول چې لا زیات ورزش ته پاملرنه وکړي او خپلې وړتیاوې لا پیاوړې کړي. همدارنګه، نوموړي زیاته کړه ، چې د هېواد سپېڅلي اسلامي او ملي ارزښتونو ته پاملرنه وکړي، د ښو اخلاقو بېلګه وګرځي، په هر ځای کې د ورورولۍ، اتحاد او ملي یووالي پېغام خپور کړي او له تعصب او بدبیني څخه ليرې اووسي.
د یادونې وړ ده، چې د کورنیو چارو وزارت د فوټبال لوبډلې ( خوست اریانا لوبډلې) تازه د زونونو په کچه د فوټبال سیالیو اتلولي، چې د هلمند ولایت په کوربتوب ترسره شوې، ترلاسه کړې ده.
