د ورزش ادارې رهبري د هرات فوټبال لوبغالي د مصنوعي چمن پرانیسته وکړه
د ورزش ادارې رهبري او ورزشي مسولینو په ګډون د هرات د فوټبال لوبغالي د مصنوعي چمن پرانیسته وکړه.
دغو مراسمو کې د ورزش ادارې عمومي رییس مولوي احمد الله وثیق، د دغې ادارې فني او مسلکي مرستیال حافظ احمد جان ځدراڼ، د فوټبال ملي فدراسیون رئیس محمد یوسف کاګر؛ د هرات، کندهار او سرپل ولایتونو د فوټبال فدراسیونونو رئیسانو او نورو ورزشي مسولینو ګډون درلود.
د یادو مراسمو په پیل کې د هرات فدراسیون رئیس شاه رسول احراري دغو مراسمو کې د ورزش ادارې رهبري له ګډون څخه مننه وکړه او د دوی دغه ګام یې په هېواد کې د فوټبال د ودې او ملاتړ لپاره ارزښتمند ګام یاد کړ؛ همدا رنګه نوموړي زیاته یې کړه، چې د ورزش ادارې د رهبري له خوا د ورزشي زیر بناوو جوړول او وده، له ځوانو استعدادونو ملاتړ او پالل به هېواد کې د فوټبال د روښانه راتلونکي سبب شي.
د ویلو ده، چې د هرات فوټبال میدان مصنوعي چمن د فوټبال ملي فدراسیون په همکارۍ د فوټبال نړۍوالې ادارې فیفا له لوري جوړ شو.
